Hláturinn lengir lífið

Við BH fórum í gær að sjá Hvers virði er ég hjá Bjarna Hauki. Verð að viðurkenna að ég átti nú svo sem ekki von á miklu. Þetta fór svona hægt af stað en endaði þannig að tárin láku því ég hló svo mikið. Þetta var heldur ekkert of langt, bara klukkutími. Mæli alveg með að fólk kíki á hann ef það nennir svona uppistandi.

Er á Bókhlöðunni núna, gengur skítsæmilega, alltaf hægar samt en ráð var fyrir gert. Það er skemmtilegra hérna núna en oft áður því ég hitti loksins á Sólveigu og systir hennar er hér einnig að læra. Þannig að nú hef ég einhvern til að fara með í smá kaffi, venjulega sit ég bara þar til blaðran er að springa og ég komin með hausverk af hungri. Það er ekki mjög gott fyrir afköstin.

KEB vill endilega fara í bíó í dag - Iron Man heillar drenginn núna. BH ákvað að skella sér með honum en fékk að vita að daman yrði ekki ánægð ef hún fengi ekki að fara í bíó líka. Hann leitaði að bíófélaga sem allar voru uppteknar. Brá á það ráð að athuga hvort amman nennti ekki að fara með henni. Jú það gekk eftir. Hann tilkynnti skvísunni að amma ætlaði með henni í bíó - en það kom smá hik á mína, virtist ekki lítast nógu vel á þetta fyrirkomulag. BH pumpaði krakkan og þá kom í ljós að hún hélt að mamma ætlaði með henni á myndina. Og BH fékk að vita að mamma hlær svo skringilega. Krakkinn sem sagt skammast sín fyrir móður sína á almannafæri þegar gaman er hjá þeirri gömlu. BH sagði nei sko AMMA þín ætlar að fara með þér - nú þá var allt í lagi, hjúkk!

Þannig að ég má lifa við það núna að vera meðvituð um minn hallærishlátur og horfi nú bara á eitthvað sorglegt í sjónvarpinu og reyni að hafa lítið broslegt í kringum mig. Fátt er svo með öllu illt, að ekki boði eitthvað gott - ég fæ þá alla vega ekki broshrukkur á næstunni :o)
Verð nú samt að láta í ljós það álit mitt að amman er öllu háværari en mamman á opinberum vettvangi - ég held ég sé alveg húsum hæf og vona að barnið skammist sín ekki alltaf fyrir mig - það væri verra. En ég hugsa mér gott til glóðarinnar þegar hún verður unglingur - það verður gaman að hrella hana þá he he.

Í bili hugga ég mig við að BH hefur nógu sterkan skráp til að þola hrossahlátur á almannafæri - hann hlær þá alla vega bara að mér ef honum ofbýður og lætur þetta ekki stoppa sig í að fara á gamanmyndir í bíó eða gamanleiki í leikhúsi - virðist slétt sama.

muuuaaaahhhaaaaaahahahaha