Mega húsmóðir

Þá er sultugerðin búin þetta árið - restin af rabarabaranum er enn hérna úti og í lagi, fer með hann bara til Betu ömmu og Lilju ömmu á morgun. Við mamma suðum 4 kg. af rabarbara í sultu og 3 kg. af rifsi í hlaup, það var bara fínn skammtur fyrir okkur í ár, alveg mátulegt. Átti m.a.s. afgangs krukkur. Nú er bara slátrið eftir í september og þá er ég búin að húsmæðrast þetta árið. Við mæðgurnar, allar þrjár, tökum slátur á hverju ári því Svandís fær þetta allt saman úr r0lluskjátunum sínum. Engin ástæða að fleygja þessu öllu saman, veit að fólk gerir það nú samt. Hirðir bara kjötið. Ég er nú svo klikkuð að ég hirði frekar slátrið og allt sem því fylgir, langar ekkert í kjötið - kannski bara lærin. En ég fer bara í mat til mömmu af og til yfir árið og fæ þá yfirleitt indælis lambalæri í matinn.

KEB fór á fyrstu æfinguna hjá Ármanni í dag er með fínum strákum í hóp og hann er svona líka spriklandi ánægður eftir tímann. Finnst ofsalega gaman, og hann sem var að eyða miklum tíma í áhyggjur af þessu öllu saman og vildi helst ekki fara. Ég átti von á þessu, að eftir fyrsta tímann myndi hann ekki vilja koma heim aftur. Frekar leiðinlegt að hann missir af næstu tveimur tímum því þeir eru á föstudögum og laugardögum. Hann er að fara með pabba sínum og fleirum í feðgaflokk í Vatnaskógi næstu helgi. Ég sagði honum að ég væri búin að borga æfingar fram til jóla, hann vildi þá bara vita hvort hann mætti ekki örugglega fara samt líka eftir áramót. Of course you can.
KBB byrjaði líka í dag í fimleikum - fengum póst um það eftir hádegi í dag að hennar hópur ætti að byrja í dag. Þannig að hún mætti ein í sínum hóp, dró Mímí með sér svo þær voru tvær. En við komumst að því að þær verða ekki saman í hóp þetta árið - en það verður í góðu lagi.

Sat hérna framyfir hádegi að fara yfir BA uppkast fyrir Sonju vinkonu - hún er að skrifa um heilsufar barna á lýðveldistímanum og fyrr. Það er dálítil vinna að fara yfir svona ritgerð, en líka skemmtilegt því maður lærir bara eitthvað nýtt líka - áhugaverð efni. Fór líka yfir ritgerð í vetur þegar Sigrún skilaði og það tók líka mikinn tíma. En þegar efnið er skemmtilegt þá er vinnan léttari :) Ég kemst ekki hjá því að spá í allar ritgerðirnar sem kennararnir fara yfir á hverju ári - þær eru reyndar styttri en töluvert fleiri, t.d. þegar um 60 nemendur og fleiri jafnvel sitja einn áfanga. Púff öfunda þá ekki - viss um að ég myndi bara leggja höndina á bunkann og áætla 8 á línuna. En ég þarf svo sem ekki að hafa áhyggjur af því - er bara farin að svitna yfir að þurfa að skrifa svona meistarastykki næsta sumar. Er enn að velta fyrir mér efni - samt svona komin með ákveðin svið sem ég er að velta fyrir mér.

Í Leirutanga 1 er stelpuhelgi framundan - við erum svona að leggja hausinn í bleyti og fá hugmyndir um hvernig best sé að nýta hana. Ætlum sennilega að fá Helenu, Aron Frosta og Lilju í mat á föstudaginn, glápa svo á stelpumynd sem hentar fyrir 8-55 ára - nóg af þeim í boði, éta sælgæti og popp. Annað er ekki ákveðið - kannski skellum við okkur í bíó bara. Svo er hefð fyrir því þegar við erum bara tvær að pæjast að KBB rænir rúminu hans BH og við kúrum saman mæðgurnar og förum snemma og seint að sofa - ég snemma og hún seint, þ.e. um kl. 22:00.

Farin í rúmið - enn að lesa Jörðin og Öxin, gengur hægt þessa dagana. Erfitt að vakna snemma en er farið að verða þolanlegt. Við KBB rúllum framúr þegar KEB er búinn að klæða sig, bursta tennur, búa um rúmið, borða og taka úr uppþvottavélinni, takk fyrir það - hmm, ætti mamman ekki að koma sér framúr fyrst - veitiggi.

Allt í lagi bleeeeeess