13. nóvember
Tók ekki myndir meira fyrr en ég var búin. Prjónaði ekki á föstudaginn, en á laugardagskvöldið prjónaði ég þar til nokkrir hringir voru eftir af kraganum, svona um hálfur kraginn. Ákvað að vera gáfuð og fara að sofa á miðnætti frekar en að þrjóskast við. Það var hlaupið í dag, sunnudag, nefnilega. Ákvað að ég þyrfti að vakna mátulega snemma svo ég gæti verið með í því. Og það gekk bara ljómandi vel. Hljóp 7km og á því aðeins eftir 5km í 50km í nóvember.
16. nóvember. Hér er peysukvikindið svo tilbúið, búið að fela enda og alles.
Fer í þvottavélina á morgun og svo má búast við að það taki sólarhringinn að þorna. Þá hendi ég flís innan á kragann og karlinn getur farið að nota hana. Þá kannski næ ég honum úr þessari svörtu. Búið að vera bölvað streð að fá hana "lánaða" í smástund til að mæla svo þær verði eins.
Tvö markmið af þremur lokið og mánuðurinn rétt hálfnaður. Ég er mjög sátt. Spurning um að lengja í hlaupamarkmiðinu - ég ætla alla vega að hlaupa út nóvember... og svo áfram bara.
Ætla að prjóna meira - finna mér eitthvað annað en peysu samt held ég. Ullarsokkar eru ofarlega á óskalistanum. Ætti að gera nokkra svoleiðis til að hælskrattinn festist í minninu. Alla vega ætla ég að gera minni stykki - langar það.
Svo ætti ég kannski að setja mér verðugt markmið. Eitthvað sem þarf að rembast við að ná og ekki er auðvelt (vissi ekki hvort þessir 50km og lopapeysa væru erfitt eða auðvelt). T.d. hafa það sem markmið að aulast í rúmið fyrir kl 23 á kvöldin og vera spræk á morgnana... líka um helgar. Það er markmið sem ég þyrfti að hafa fyrir - ég ætla aðeins að sofa á því.
Later
Ummæli