Tarot dagsins

Er á fullu að klára vsk - redda afmælisgjöf - baka - þrífa - versla fyrir afmælið. Nóg að gera og dagurinn hálfnaður. Eina sem ég er búin að gera er að bjóða í afmælið. Afmælisbarnið upptekið af sjálfu sér í skóla og á æfingum.

 

Sit hérna í vinnunni til að klára skattinn og borga hann. Alltaf svo "gott" þegar það er búið, fyrir utan að maður er peningunum "fátækari" :)

 

Alla vega, fékk sent á MSN Tarot dagsins hjá eiginmanninum, hann að fletta "nýjum" vef Vísis og prófaði að draga spil. Þetta er það sem ég fékk sent:

 

Stafakonungur

Maðurinn hér er ábyrgðarfullur mjög sem er mikill kostur. Hann er öruggur í framkomu og býr yfir réttu viðhorfi til lífsins. Hann er sterk manneskja þegar kemur að andlegum styrk en er oft á tíðum með hugann við annað en starfið. Hann er opinn fyrir skoðunum annarra og er góður og hreinskilinn ráðgjafi þegar kemur að því að taka mikilvægar ákvarðanir.

Hann er orkumikill og er húmoristi, en á það til að vera óþolinmóður þegar kemur að smáatriðum. Traustur eiginmaður og næmur faðir er hann. Hann er hugmyndasmiður.

 

Ég get ekki annað en verið sammála þessu bara og fannst þetta spil vel við hæfi. Held það passi allt þarna bara. Auðvitað var hann hinn lukkulegasti með spilið fína og brosti hringinn.

 

Við ræddum aðeins hvað væri nú mikið að marka allt svona - mátulega vantrúuð á þetta, hann sennilega meira en ég því mér finnst allt svona skemmtilegt og spennandi, þó ég sé kannski ekki að gleypa allt svona hrátt samt.

 

Jú ég er að vinna og smá í kappi við tímann en stóðst ekki mátið og dreif mig inn á visir.is og skrollaði á tarot dæmið. Valdi spil og þetta er það sem ég fékk:

 

5 bikarar

Hamingjubikar þinn hefur eflaust ekki fundið hið sanna jafnvægi sem á vel við þig og hentar þér. Hér kemur fram einhverskonar missir eða vonbrigði sem kann að ýta undir leiða hjá þér. Ef þú leyfir þessari líðan að ná yfirtökum á annars jákvæðri orku þinni og viðhorfi er hætta á að neikvæðar tilfinningar þínar verði þér þungbærar og magnist í huga þér og ýti þar með undir ójafnvægi sem á ekki við þig.

Þú ættir að leggja þig fram við að opna hjarta þitt fyrir því sem eflir þig á góðan máta og kasta frá þér þeim þungu byrðum sem gætu tengst þessari óánægju sem birtist.

Í hverju vandamáli felast dulbúin tækifæri.

 

Við fórum bara að hlæja því þetta á einstaklega vel við - ég tek þetta til mín og nýti alla mína krafta í að finna jákvæða strauma og láta ekki neikvæðni og vonbrigði ná algjörlega yfirtökum á lífinu. Það er svo mikil sóun. Nú dríf ég bara í að grípa tækifærin... með nokkur sem ég veit að þarf að stökkva á í hvelli :)

 

Later